នៅថ្ងៃព្រហស្បតិ៍ ១៣រោច ខែមិគសិរ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី១៨ ខែធ្នូ ឆ្នាំ២០២៥នេះ ឯកឧត្តមសាស្រ្តាចារ្យបណ្ឌិត អឿង ចន្ថា អនុរដ្ឋលេខាធិការ ក្នុងនាមតំណាងដ៏ខ្ពង់ខ្ពស់ឯកឧត្តម ថោ ជេដ្ឋា រដ្ឋមន្ដ្រីក្រសួងធនធានទឹក និងឧតុនិយម បានអញ្ជើញចូលរួមជាអធិបតីក្នុងពិធីសម្ភោធដាក់ឱ្យដំណើរការ «សេវាកម្មពិគ្រោះយោបល់អំពីកសិ-ឧតុនិយម នៅកម្ពុជា» ក្រោមគម្រោង “ភាពជាដៃគូរវាងរដ្ឋ សហគមន៍ និងវិស័យឯកជនដើម្បីកសិកម្មមានលក្ខណៈភាតរបរិស្ថាន និងជីវភាពប្រជាជនមានភាពធន់នៅខាងជើងបឹងទន្លេសាប (ហៅកាត់គម្រោងគជ់)” នៅសណ្ឋាគារ Sun & Moon Riverside។
ឯកឧត្តមអនុរដ្ឋលេខាធិការបានបញ្ជាក់ឱ្យដឹងថា សេវាកសិ-ឧតុនិយមកម្ពុជា (CAS) ផ្តល់ព័ត៌មានឧតុនិយមស្វ័យប្រវត្តិ និងសេវាប្រឹក្សាឧតុនិយមជាក់លាក់ដល់កសិករ និងសហគមន៍មូលដ្ឋានឱ្យបង្កើនការយល់ដឹងអំពីហានិភ័យអាកាសធាតុសម្រាប់ដំណាំស្វាយ ស្វាយចន្ទី ស្រូវសរីរាង្គ និងបន្លែស្លឹក តាមរយៈវេបសាយ និងទូរស័ព្ទ ហើយចែកចាយទៅកសិករដោយផ្ទាល់តាម Telegram សេវាផ្សព្វផ្សាយកសិកម្ម និងបណ្តាគេហទំព័រផ្សេងៗ។
ក្នុងឱកាសនោះ ឯកឧត្តមអនុរដ្ឋលេខាធិការបានប្រសាសន៍ថា ក្រសួងធនធានទឹក និងឧតុនិយម ជួយគាំទ្រ ទី១)ធ្វើការជួសជុលស្ថានីយឧតុនិយស្វ័យប្រវត្តិចាស់ឱ្យដំណើរការឡើងវិញ និងដំឡើងស្ថានីយឧតុនិយមស្វ័យប្រវត្តិថ្មីៗបន្ថែម ទី២)រៀបចំសិក្ខាសាលាបណ្តុះបណ្តាលស្តីពី ការថែទាំ និងប្រតិបត្តិការឧបករណ៍ឧតុនិយម និងការគ្រប់គ្រងមូលដ្ឋានទិន្នន័យដល់មន្រ្តីបច្ចេកទេសថ្នាក់ក្រោមជាតិ និងទី៣)ផ្តល់នូវទិន្នន័យពីស្ថានីយឧតុនិយមស្វ័យប្រវត្តិ និងផលិតផលព័ត៌មានអាកាសធាតុ នៅក្នុងខេត្តគោលដៅគម្រោង។
ឯកឧត្តមអនុរដ្ឋលេខាធិការបានគូសបញ្ជាក់ថា ក្រសួងធនធានទឹក និងឧតុនិយមបានដើរតួនាទីយ៉ាងសំខាន់ក្នុងផ្តល់ព្រឹត្តិបត្រព័ត៌មានកសិ-ឧតុនិយម និងការជូនដំណឹងជាមុនអំពីគ្រោះមហន្តរាយដែលនឹងកើតឡើងនាពេលខាងមុខ ដល់ក្រសួងកសិកម្ម រុក្ខាប្រមាញ់ និងនេសាទ ដើម្បីជួយពង្រឹង និងធ្វើឱ្យប្រសើរឡើងដល់វិស័យកសិកម្មនៅកម្ពុជា៕
